Хабарингиз бор, кеча ЖЧ-2018 саралашидан ўрин олган Ўзбекистон – Филиппин ўртасидаги учрашув бўлиб ўтди. Унда вакилларимиз Анзур Исмоиловнинг бош билан киритган ягона голи эвазига ғалаба қозонишди. Ўз навбатида, Ўзбекистон миллий терма жамоаси ўз гуруҳида пешқадамга айланиб олди. Учрашувдан сўнг эса Анзур Исмоилов SPORTS.uz мухбирига ўйин борасида ўз фикрларини билдириб ўтди.
Учрашув тўғрисида қандай фикрдасиз?
- Кўриб турганингиздек, жуда кўплаб имкониятларга эга бўлдик. Камида 5та яққол голга тортадиган вазиятлар бўлди. Аммо ундан фойдалана олмадик. Лекин 1:0 ҳисобида ғалаба қозондик. Шу 1:0 ҳисоби ҳам 3 очко тақдим этади. Мақсадимиз, бу ўйинда рақибни мағлуб этиб, биринчи ўринга кўтарилиб олиш эди.
Бахрайн билан ўйин ҳақида...
Бахрайн билан ўйинга келадиган бўлсак, улар билан олдин ҳам ўйнадик ва уларни ўрганиб чиқдик. Тайёргарлик маромида. Футболчиларнинг барчаси тушуниб турибди. Биз учун бу уруниш охиргиси. Чунки ёшимиз ўтиб бормоқда. Шунинг учун ЖЧга чиқишга астойдил ҳаракат қиламиз.
Голни ажойиб тарзда нишонладинглар...
Тўғри, голни бошқача нишонладик. Сервер Жепаров янги фарзанди учун шундай қилдик. Голга келадиган бўлсак, мен керакли жойда пайдо бўлдим ва дарвозани ишғол қилдим.
Филиппиндан қандай қаршилик кутгандинглар?
Филиппиннинг имкониятларини биламиз. Шунинг учун улардан яхшигина қаршилик кутгандик. Асосийси омад биз томонда бўлди. Балки голни эртароқ урганимизда, ҳисоб 5:0 бўлармиди?
