Ўзбекистон кубогининг нимчорак финал босқичи доирасида бўлиб ўтган “Нефтчи” – “Насаф” учрашувидан кейинги матбуот анжуманида дастлаб қаршиликлар устози Рўзиқул Бердиев иштирок этди.

— Бугунги ғалабани асосий омили – рақибга нисбатан яхшироқ ўйин кўрсатдик, тактик жиҳатдан устунлик қилдик. Натижада кейинги босқичга чиқиш учун катта қадам ташладик. Тўғриси, йирик ҳисобда ғалаба қозонишни кутмагандик. “Нефтчи” ўз майдонида одатда ҳужумкор ўйин намойиш этарди. Биз яратган вазиятларимиздан самаралироқ фойдаландик. Шу сабаб йирик ғалабага эришдик. Бугун таркибимизда бир қатор йўқотишлар бор эди. Геворкян ва Суюнов ўз терма жамоаларига жалб этилган бўлса, Мақсуд Каримовни кичик жароҳат безовта қилаётганди. Уч нафар ёш футболчимиз – Бобур Абдухолиқов, Азиз Ғаниев ва Шароф Муҳиддинов ҳам ёшлар термасидан чақирув олишган эди... Сайдулла Раҳматов? У бизнинг ишончимизни тўла тўкис оқлаяпти. Ундан хурсандмиз. Унинг потенциали юқори.