«Барселона» жамоасининг уругвайлик ҳужумчиси Луис Суарес ўзи ва жамоадоши, бразилиялик футболчи Неймар ўртасида Уругвай ҳамда Бразилия терма жамоалари ўртасидаги баҳс натижасига тикилган гамбургер ҳақида эслатди.
25 март оқшомида 2018 йилги ЖЧ саралаши доирасида ўтказилган ўйин 2:2 ҳисобида якунланган. Ўйиндан олдин каталонияликлар клубида тўп сурувчи бу икки футболчи кимнинг терма жамоаси мағлубиятга учраса, у гамбургер олиб бериши бўйича баҳслашишганди.
«Ўйинда ҳеч қайси томон ғалаба қилмади, ҳеч ким мағлуб ҳам бўлмади. Биз Ней иккимиз битта гамбургер учун биргаликда пул тўладик ва уни бўлишиб едик.
Мени қўллаб-қувватлашганидан хурсандман, ахир анча вақтдан буён терма жамоада ўйнамагандим.
Биз Бразилия билан ўйинда очко қўлга киритдик, бу очко муҳим бўлиб чиқиши мумкин», – дейди Суарес.
