Тошкентнинг «Локомотив» футбол клуби Россия миллий терма жамоаси ва Москванинг «ЦСКА» клуби ярим ҳимоячиси Роман Широковга қизиқиш билдирган. Бу ҳақда «Sports.ru» сайтидаги «Ўзбек ошхонаси» («Узбекская кухня») блоги муаллифи Евдоким Раимов ўз Twitter аккаунтида маълум қилди.

12 апрелга ўтар кечаси эълон қилинган твитда «Тошкентнинг «‘Локомотив’ клуби Роман Широков билан қизиқмоқда. Ҳаммага яхши тушлар», — деб ёзилган «Локомотив» клуби бош директори ўринбосари Тўлабек Акрамовнинг «Дарё»га маълум қилишича, жамоа ОЧЛ гуруҳ босқичи якунига қадар янги футболчи масаласини кўриб чиқаётгани йўқ: — «Локомотив» мавсум олдидан ўзига керакли футболчилар билан шартнома имзолаб бўлган ва ёзги танаффусга қадар жамоага янги футболчи жалб қилишни режалаштираётгани йўқ. Таркибни кучайтириш ёки қайсидир футболчини трансферга қўйиш масаласи Осиё Чемпионлар Лигасининг гуруҳ босқичидан кейингина кўриб чиқилиши мумкин».

Маълумот учун, 1981 йилда туғилган Роман Широков Россия миллий терма жамоасининг сардори ҳисобланади ва у Евро—2016 саралаши доирасидаги 10 та учрашувидан олтитасида ҳаракат қилди. Россия Премьер-лигасининг 2015/16 йилги мавсумида «ЦСКА» учун 5 та учрашувда иштирок этди. 2009—2010 йилларда Тошкент «темирйўлчилари» сафида Россия миллий терма жамоасининг бошқа бир аъзоси — дарвозабон Александр Филимонов ҳаракат қилган.