БААнинг "Аш-Шабоб" клуби ярим ҳимоячиси Азиз Ҳайдаров Ўзбекистон терма жамоасининг ЖЧ-2018 саралаш босқичидаги мақсадлари ҳақида гапириб ўтди. Бу ҳақда www.sport360.com сайтига асосланиб, stadion.uz хабар тарқатди.

Бугун Малайзия пойтахти Куала-Лумпур шаҳрида ташланган қуръа натижасида Ўзбекистон терма жамоаси "А" гуруҳида Эрон, Жанубий Корея, Хитой, Қатар ва Сурия терма жамоаларига қарши баҳс олиб борадиган бўлди.

"Қуръада қайси жамоа бизга рақиб бўлишининг аҳамияти йўқ эди. Барча 12 жамоа кучли. Кўриб турганингиздек, барча жамоалар футбол ўйнашни билади.

Мураббийимиз бизга шуни таъкидладики, агар жаҳон чемпионатига боришни истасак, ўз уйимиздаги барча ўйинларни ютишимиз керак".

2011 йилда БАА чемпионатига кўчиб ўтган Ҳайдаров, шу пайтгача "Аш-Шабоб" сафида 97та ўйинда майдонга тушиб, 12та гол уришга муваффақ бўлган.

"БАА терма жамоаси мен учун иккинчи жамоа. Мен уларни қўллаб-қувватлайман. Уларни ЖЧ-2018 саралашининг 3-босқичига чиққани билан табриклайман. БАА термаси яхши тайёргарлик кўрса ҳамда бироз омад келса, иншооллоҳ, жаҳон чемпионатига боради. Мен БААни Мундиалда кўришдан хурсанд бўлардим".

"Терма жамоада ўзимни яхши ҳис қиляпман. Ўзбекистон терма жамоаси саралашнинг аввалги босқичида катта ҳажмдаги ишни амалга оширди ва кетма-кет 7та ўйинда ғалаба қозондик. Энди сўнгги гуруҳ босқичига киришамиз. ЖЧга бориш учун сидқидилдан меҳнат қиламиз".