"Бухоро" - "Насаф" учрашувидан кейин матбуот анжумани бўлиб ўтди. Матбуот анжуманининг биринчи қисмида жамоамиз бош мураббийи Рўзиқул Бердиев иштирок этди.
-Учрашув ажойиб муҳитда ўтди. Ўйинга келадиган бўлсак, “Бухоро”ни чуқур ўргангандик. Мазкур баҳсга тактик схемамизни бироз ўзгартириб, бешта ярим ҳимоячи билан ҳаракат қилдик. Болаларимизни ғалабага булган иштиёқи кучлилик қилди. Бу тактика иш берди.
Олдинги йилгига қараганда бу йил “Бухоро” анча жиддий, мақсади юқори жамоа эканлиги кўриниб турибди. Улар юқори ўринлар учун курашишга қодир. Бу таркиб билан буни амалласа бўлади. Ўйинни топиб олиши учун вақт керак. Охирги йилларда клубимиз сиёсати – ўз футбол мактабидан иқтидорли ёшларни чиқариш, уларга имкон бериш. Улар ҳам қайсидир маънода ўзини оқлаяпти.
Бойдуллаев ва Шомуродовнинг аҳволи? Албатта бугун уларнинг ўрни жуда билинди. Шомуродов даволанмоқда. Кейинги уйинда сафимизга қўшилди. Эркин эски жароҳатини янгилаб олган. Геворкян қизил карточка туфайли бугунги ўйинни ўтказиб юборди. Бу футболчилар билан Сайфиев ва Ҳамробеков сафимизга қайтса, ўйинимиз янада кучайиши аниқ.