1news.uz —  Ўзбекистон миллий терма жамоаси бош мураббийи Самвел Бабаян  Жаҳон чемпионати 2018 саралашининг учинчи босқичи учун қуръа натижалари ва ушбу босқич борасидаги фикрлари билан  ўртоқлашар экан, Ўзбекистон футбол федерацияси томонидан жамоа ҳеч нарсага муҳтож бўлмаслиги учун, керакли барча шароитлар яратиб берилаётганлигини алоҳида таъкидлади.

Саралаш босқичи гуруҳдаги асосий рақибларимиздан бири бўлган Эрон терма жамоасида эса бу борада маълум бир муаммолар борлиги ошкор қилинди. Бу ҳақда Эрон терма жамоаси мураббийи Карлуш Кейруш журналистларга баёнот берди. Унинг айтишича, бош мураббий лавозимида ортиқ ишлолмайди, негаки яратилган шароит кескин танқиддан бошқага ярамайди.

– Бундай шароитда ишлашнинг имкони йўқ – ойлик маош тўланаётгани йўқ, жамоанинг Жаҳон чемпионати 2018 саралаш ўйинларига тайёргарлик кўриш учун маблағ ажратилмаяпти. Ўйинчилар ҳам пулсиз ўтиришибди. Ваъдаларнинг вақти ўтди. Вазият бир йил, икки ва беш йил аввал қандай бўлса, шундайлигича қолмоқда. Бу кетишда лавозимимдан кетишим тайин. Фақат ҳукуматнинг аниқ ҳаракатларигина вазиятни ўзгартириши мумкин, – дейди португалиялик мутахассис A Bola нашрига  берган интервьюсида.

Шуни таъкидлаш лозимки, Кейруш бош мураббий лавозимини бир йил аввал тарк этган бўлар эди. Аммо маҳаллий ҳукумат солиқларни тўламаганлиги учун унга нисбатан жиноий иш очиб, мамлакатни тарк этишни таъқиқлаб қўйган.