«Sports.ru» блогери Artak79 футбол бўйича Европа чемпионатларининг 2015/16 йилги мавсумида ҳозиргача энг кўп гол киритган ва «Олтин бутса» мукофотига даъвогар футболчилар суратини эълон қилди.

Суратда «Олтин бутса»га даъвогарлар 10 нафар футболчи келтирилган. Унда ҳар бир футболчининг ўзи иштирок этаётган мамлакат чемпионати доирасида киритилган голлари ҳисобланган.

Испания чемпионатида 34 та гол киритган «Барселона» ҳужумчиси Луис Суарес тўпурарлар рўйхатида пешқадам бўлиб туриди. 31 тадан голга муаллифлик қилган Криштиану Роналду («Реал») ҳамда Жонас Оливейра («Бенфика») ушбу рўйхатдан тегишли равишда 2 ва 3-ўринларни эгаллаган.

2015/16 йилги мавсумнинг «Олтин бутса» мукофотига даъвогар футболчилар:

1. Луис Суарес – 68 очко / 34 та гол («Барселона», Испания)
2. Криштиану Роналду – 62 очко / 31 та гол («Реал», Испания)
3. Жонас Оливейра – 62 очко / 31 та гол («Бенфика», Португалия)
4. Гонсало Игуаин – 60 очко / 30 та гол («Наполи», Италия)
5. Роберт Левандовски – 54 очко / 27 та гол («Бавария», Германия)
6. Лионель Месси – 50 очко / 25 та гол («Барселона», Испания)
7. Златан Ибраҳимович – 48 очко / 32 та гол («ПСЖ», Франция)*
8. Ҳарри Кейн – 48 очко / 24 та гол («Тоттенҳэм», Англия)
9. Ислам Слимани – 48 очко / 24 та гол («Спортинг», Португалия)
10. Карим Бензема – 46 очко / 23 та гол («Реал», Испания)

*1997 йилдан бошлаб «Олтин бутса» ғолибини аниқлашда футболчи томонидан киритилган голлар сони чемпионат коэффициентига кўпайтирилади. Европанинг энг кучли бешта чемпионатида киритилган ҳар бир гол 2 очкога, 6–21-поғоналардан ўрин олган чемпионатларда киритилган гол 1,5 очкога, қолганларида эса 1 очкога баҳоланади. Ҳар бир чемпионат турли даражада бўлгани учун ғолибни объектив тарзда аниқлаш мақсадида шундай тизим жорий этилган.

28 апрель ҳолатига кўра, Испания, Германия, Англия, Италия ва Португалия чемпионатлари УЕФА рейтингида мос равишда 1—5-ўринлардан жой олган. Франция 1-Лигаси эса УЕФА рейтингида 6-поғонани банд қилиб турибди.