Биласиз, кеча Олий Лигада 7-турнинг марказий учрашуви бўлиб ўтди. Унда мамлакатимизнинг икки етакчи жамоалари – “Бунёдкор” ва “Пахтакор” ўзаро баҳс юритишди.

Мазкур беллашувда “қалдирғочлар” 3:0 ҳисобида ғалаба қозонишди. Беллашувда “Бунёдкор”нинг иккинчи голига муаллифлик қилган ёш футболчи Забиҳилло Ўринбоевнинг ўйин борасидаги фикрлари билан қизиқдик.

- “Пахтакор”дек кучли рақиб устидан ғалаба қозонганимиздан жуда ҳам хурсандман. Ушбу ғалаба билан “Бунёдкор”нинг барча ишқибозларини табриклайман. Аммо шу ўринда таъкидлашим жоизки, ўйин осон ўтмади. Айниқса, биринчи бўлимда рақиб ҳам жуда кучли ўйин намойиш этди. Лекин якунда биз ғалаба қозона олдик. Мен ҳам гол киритганимдан шодман, албатта. Мавсум бошидан буён илк бор рақиб дарвозасини ишғол этдим. Насиб этса, кейинги ўйинларда ҳам голларим билан жамоамга наф келтиришга уринаман, - дейди Забиҳилло Ўринбоев SPORTS.uz мухбирига.

Таъкидлаб ўтамиз, Забиҳилло Ўринбоев ушбу учрашувда жорий мавсумдаги дастлабки голини киритишга муваффақ бўлди.