Осиё чемпионлар лигаси гуруҳ босқичи сўнгги 6-тур учрашуви доирасидаги “Ал-Айн” – “Насаф” учрашуви олдидан матбуот анжумани бўлиб ўтди.

Матбуот анжуманининг дастлабки қисмида “Ал-Айн” жамоасининг бош мураббийи Златко Далич ва жамоанинг 6-рақамдаги бразилиялик ярим ҳимоячиси Флип Бастос иштирок этишди.

Златко Далич: — Эртага бизни жуда қизиқ ва қийин учрашув кутиб турибди, гуруҳимиздаги учта жамоанинг ҳам имконияти бир хил. Биз учун уч очко керак, шунга ҳаракат қиламиз. Олдинги ўйинда кўрдик, “Насаф” жамоаси жуда кучли жамоа ва кучли ўйин кўрсата олади. Охирги кунларда биз бўлажак ўйинга жуда яхши тайёргарлик кўрдик, ўйлайманки, эртанги ўйнга тайёрмиз. Эртага, тезкор ва биринчи бўлиб гол уриш учун уриниб кўрамиз. Шунингдек, биз ҳар қандай вазиятга тайёр туришимиз керак бўлади. Мен ўзимга ва жамоамга қаттиқ ишонаман, эртага биз албатта ўз мақсадимизга эришамиз. Мамлакат чемпионати биз учун якунига етди, мусобақа жадвалида иккинчи ўринга сазовор бўлдик. Энди бор диққат эътиборимизни ОЧЛ ўйинларига қаратамиз.

Флип Бастос: — Эртага мухлислар учун жуда қизиқарли учрашув бўлади, биз ушбу ўйинга тайёрмиз. Мураббийимиз бизга ҳозирдан кўрсатмаларни бериб бўлган, агар биз эртага бу кўрсатмаларни тўлиқ бажарсак, ўйлайманки ғалаба биз томонда бўлади.