The World Series Boxing (WSB), яъни Бутунжаҳон Бокс сериясининг олтинчи мавсумида муваффақиятли иштирок этаётган “Ўзбек йўлбарслари” жамоаси ярим финал учрашувида иштирок этиш мақсадида Куба пойтахти Гавана шаҳрига жўнаб кетди.
Эслатиб ўтамиз, боксчиларимиз чорак финалда Россиянинг “Russian Boxing Team” жамоаси меҳмони бўлиб, 6:4 ҳисобида ғалаба қозонган эди. Куба жамоаси эса чорак финалда Мексика жамоасидан 10:0 ҳисобида устун келганди.
5 ва 6 май кунлари Гаванадаги “Coliseo Ciudad Deportiva” аренасида Тўлқин Қиличев мураббийлигидаги “Uzbek Tigers” жамоаси “Cuba Domadores” боксчиларига қарши рингга кўтарилади. Дастлабки кун 5та, 6 май куни эса яна 5та вазн тоифасида жанглар ташкил этилади. Икки кунлик жанглар натижасига кўра финалга йўлланма олган жамоа номи маълум бўлади.
Гаванага терма жамоамизнинг етакчи боксчиси, 49 кг вазн тоифасида Рио-2016 Олимпиадаси йўлланмасини қўлга киритиб улгурган Ҳасанбой Дўсматов бормади. Терма жамоа мураббийлари Олимпиада олдидан эҳтимолли жароҳатларнинг олдини олиш мақсадида асосий таркиб боксчиларига дам беришни мақсад қилишган.
Шундай бўлсада, таркибдан Муроджон Аҳмадалиев, Фазлиддин Ғойибназаров сингари Олимпиада йўлланмасини қўлга киритган боксчиларимиз ҳам жой олишган.
