Олий лиганинг 8-тури доирасида бўлиб ўтган "Шўртан" - "Сўғдиёна" ўйини (4:2) борасида меҳмонлар бош мураббийи Даврон Файзиев ўз фикрларини билдириб ўтди.

"Авваламбор иккала жамоа мухлисларига бизни қўллаб-қувватлаганлари учун раҳмат айтмоқчиман. Ўйинга тўхталадиган бўлсам, учрашув жуда қизиқарли кечди. "Шўртан" жамоаси бугун эгаллаб турган ўрни жамоага мос эмаслигини яна бир бор амалда исботлашди. Учрашувдан олдин рақибимизнинг ўтган турлардаги ўйинларини кўриб чиқиб, шогирдларимга хотиржам ўйин кўрсатишларини ва рақибни менсимаслик мумкин эмаслиги тўғрисида кўрсатма бергандим. Аммо, футболчиларим рақиб турнир жадвалининг сўнги поғонасида юргани сабабли, "Шўртан"га нисбатан тўғри баҳо беришолмади. Рақибимиз эса бизни бу ҳаракатларимиз учун жазолади. Бундан тўғри ҳулоса чиқариб ишлашда давом этамиз. Йигитлардаги рақибни ўйиндан олдин ютиб қўйганлик тўғрисидаги нотўғри хаёлларни ўйингача тарқата ололмаганим, менинг энг катта хатом деб ўйлайман. Мағлубиятни тан олишдан бошқа иложимиз йўқ. Мақсадимиз сари ҳаракат қилишда давом этамиз", — дейди Даврон Файзиев.