Луи ван Гаал журналистларга "ҳаммаси тугади", деганда клубдан кетишига ишора қилганди. Унинг ўрнига Жозе Моуриньо келмоқда. "МЮ" раҳбарияти унга трансферлар учун 200 миллион фунт ажратади. Хўш, португалиялик мураббий Манчестерга келса, жамоада қандай ўзгаришлар кузатилади? Кимлар кетадию, кимлар келади? Шу ҳақда озгина фикр юритамиз.
Кетиши кутилаётганлар
Хуан Мата
Бу клубни тарк этадиганлар рўйхатида биринчи ўринда турган футболчи. Чунки Мата ва Моуриньо "Челси"да бирга ишлаб кўрган, кейинчалик Хуан Лондондан Манчестерга кўчиб ўтганди. Агар Моур келса, Матанинг клубни тарк этиш эҳтимоли юқорилаб кетади.
Маркос Рохо
Бу мураббийлик услубига мос келмагани учун эмас, шунчаки Рохо яхши савияга эга эмас. Моуриньонинг унга ишонишига мутахассислар ишонмаяпти. Тўғри, Маркос ҳали ёш, аммо клубнинг кутиб туришга вақти йўқ.
Аднан Янузай
Бельгиялик футболчи тез порлаб, тез сўнган юлдуз футболчилар тоифасига киради. Бунга сабаб, албатта, Девид Мойес ва Луи ван Гаалдир. Лекин унинг ўзига ҳам боғлиқ. Моуриньо у билан ишламаса керак. Чунки у таваккал қилишни истамайди.
Морган Шнайдерлин
Ўтган мавсумда 25 миллион фунт эвазига "Манчестер Юнайтед" жамоасига қўшилган Морган ёрқин ўйин намойиш этолмади. Барқарор ҳаракат қилиш учун имконият тополмади. Ундан кўра, Майкл Керрик ишончлироқ ўйнади. Шунинг учун у ҳам клубдан кетиши мумкин.
Мемфис Депай
Яна бир омадсиз футболчи. Унинг ҳаракатларини Роналдуга қиёслашганди. Тўғри, унинг майдондаги ҳаракатлари яхши, лекин барқарор эмас. Балки доимий ўйин амалиёти йўқлиги учундир. Ҳар ҳолда Депай ҳам жамоадан кетиши мумкин бўлган футболчилардан.
Райан Гиггз
Ҳа, у ҳам кетиши мумкин. Чунки бу ҳақда зўи айтган. Гиггз клубда уч йилдан ортиқроқ ёрдамчи мураббийлик қилди. Унга тўлиқ ишонишларини кутди. Лекин раҳбарият Моуриньони олиб келмоқда. Энди Райан ўзига бошқа иш қидиради.
Келиши кутилаётганлар
Рафаэль Варан
Жозе Моуриньо биринчи навбатда "МЮ" ҳимоясини кучайтириши табиий. Шунинг учун ўзи бирга ишлаган "Реал" Мадрид ҳимоячиси Рафаэль Варан Манчестерга келиб қолиши эҳтимолдан йироқ эмас. Агар шундай бўлса, "МЮ" ҳимоясида ўзгариш кузатилади.
Жон Стоунес
"Эвертон" ҳимоячиси ҳам кучайтирув операция режасига киритилган. Шунинг учун Моуриньо энг аввало Жонни сотиб олишга уринади. Чунки унинг "Эвертон"да ҳам унча иши юришмаяпти.
Уилям Карвальо
Балки бу футболчи ҳақида ҳали эшитмагандирсиз. Лекин "Спортинг"да у ушбу мавсумда порлади. Ренату Саншеш "МЮ"га ўтмагач, энди бор умид Карвальодан. Мазкур ярим ҳимоячи Моуриньо чақириғига лаббай деб жавоб бериши мумкин.
Гонсало Игуаин
Игуаин ҳақида ҳам юқоридаги фикрларни айтиш мумкин. У ҳам голурар футболчи, Моуриньони яхши билади. Лекин ўйини унчалик барқарор эмас. Ёки чемпионат танлайди.
Златан Иброҳимович
"ПСЖ"даги фаолиятини якунлаган Златан катта эҳтимол билан "МЮ"га келиши мумкин. Бу ҳақда Британия ОАВ бир неча кундан бери тинмай бонг урмоқда. Агар у келса, Моуриньога ёрдамчи мураббий сифатида ҳам ишлайди.