Кеча, 3 июнь куни Тошкентда Марказий Осиё футбол ассоциацияси (МОФА)нинг навбатдаги ташқари конгресси бўлиб ўтди. Бу ҳақда Қирғизистон футбол федерацияси расмий сайти хабар тарқатди.

Конгрессда ассоциацияга аъзо мамлакатлар футбол федерацияларининг вице-президентлари ва бош котиблари иштирок этишди. Йиғилиш давомида МОФА аъзолари минтақада футболни ривожлантириш масалаларини муҳокама қилишди. Шунингдек, ташкилотнинг қўмиталари таркиблари тасдиқланди.

Бундан ташқари, 6та мамлакатнинг эркаклар ўртасида U19 ва аёллар ўртасида U18 мусобақаларини ўтказиш ҳақида қарор қабул қилинди. Ушбу турнирларнинг 2016 йилнинг иккинчи ярмида ташкил этилади.

Конгресс давомида делегатлар Ўзбекистон миллий олимпия қўмитаси ва спорт медицинаси бўйича илмий-тадқиқот марказида бўлишди.

Эслатиб ўтамиз, 2015 йилнинг январь ойида Австралиянинг Мельбурн шаҳрида бўлиб ўтган ОФКнинг навбатдаги конгрессида Осиёда янги Марказий Осиё футбол ассоциацияси ташкил этилганди. Унга аъзо сифатида Ўзбекистон, Туркманистон, Қирғизистон, Тожикистон, Эрон ва Афғонистон футбол федерациялари киришди. МОФА марказий сифатида Тошкент шаҳри танланди ва Мираброр Усмонов ташкилот раҳбари сифатида тайинланди.