Бразилия терма жамоасининг бош мураббийи Дунга Перуга (0:1) қарши ўтказилган ўйиндан сўнг, жамоасининг мағлубиятига бош ҳакам сабабчи эканини айтди. Ўйиндаги ягона гол 75-дақиқада Руидиас томонидан қўл билан урилганди.

“Биргина вазият барча ишимизни чипакка чиқарди. Энди буни ўзгартиришнинг иложи йўқ. Ён ҳакам буни нимага пайқамай қолгани менга қоронғи. Ҳакамлар вазиятни 4 дақиқа муҳокама қилишди. Катта экранда намойиш этилган такрорий лавҳада гол қўл билан урилгани яққол кўриниб турди.

Истеъфо? Мен фақат ўлимдан қўрқаман. Жаҳон чемпионатидан сўнг терма жамоада катта ўзгаришларни амалга оширдик. Бизга Германияни мисол келтиришади, лекин улар бу ўзгаришларни 14 йилда амалга оширишди. Биз эса 1-2 йил ичида барча муаммолардан халос бўлишни истаймиз” – деди Дунга Globo Esporte хабарига кўра.