Францияда ўтаётган Европа чемпионатида бугун чорак финал баҳсларига старт берилади. Ярим финал йўлланмаси учун Польша ва Португалия терма жамоалари майдонга чиқишади.

Ҳозирда Польша терма жамоасининг муваффақиятли ўйинлари туфайли мамлакатда ҳақиқий байрамона муҳит ҳукм сурмоқда. Ўйинчиларнинг ўзларига бўлган ишончи ортиб, улардаги яхши кайфият сезилмоқда. Навалка шогирдлари ҳимояда яхши ўйин кўрсатаётган энг яхши жамоалардан бири бўлиб турибди (жамоа 4та ўйинда битта гол ўтказиб юборди). Шунингдек, жамоанинг ҳужумдаги ишлари ҳам ёмон эмас. Ҳамма гап футболчиларнинг қанчалик тикланишга улгурганида. Польшаликлар Швейцарияга қарши 120 дақиқалик ўйинда иштирок этишди. Ўшанда терма жамоа рақибга нисбатан 2 кун камроқ дам олганди. Ҳозир эса вазият бошқача.

Хорватларга қарши ўйинда Португалия яхши ҳимояланди. Терма жамоа бош мураббийи Сантуш ярим ҳимоячиларни ромб шаклида жойлаштирган ҳолда 4-4-2 тактик схемасидан фойдаланмоқда. Захирадан майдонга тушган Ренату Санчеш ўйинга ажойиб қўшилиб кетди ва учрашувнинг энг яхши футболчиси деб топилди. Шу боис у бугунги баҳсни асосий таркибда бошлаши мумкин. Шунингдек, Роберт Левандовски бошчилигидаги ҳужумчиларни тўхтатиш учун Жозе Фонте ҳам илк дақиқалардан майдонга тушиш керак. Португалия босим остида ўйнаётган бўлса-да, ўз кучига ишонади ва ярим финалга чиқиш учун фаворит ҳисобланади.

Ўйин Тошкент вақти билан тунги 00:00да бошланади. Учрашувдан ташкил этиладиган матнли онлайн трансляцияни Stadion.uz'да кузатиб боришингиз мумкин.