Златан Иброҳимович ва Мидо «Аякс» таркибида ўйнаган пайтларида юзага келган можаро ҳақида гапириб беришди.

«ПСВ бизни мағлуб этгандан сўнг, Мидо кийиниш хонасида ҳаммани бўралаб сўкди, мен ҳам унга қаттиқ жавоб қайтардим. Сўнгра у қўлидаги қайчини менга қараб отди. Қайчи бошим ёнидан визиллаб ўтиб кетди ва деворга санчилди», — деди Иброҳимович The Sun томонидан ишланган янги ҳужжатли фильмда.

«Таъбим жудаям хира эди. 0:2 ҳисобида майдонга тушдим. Златан билан жанжал майдондаёқ бошланиб кетди. Кийиниш хонасида бир-биримизга бақирдик. Қайчи билан оёғимдаги боғичларни ечаётган эдим, жаҳл устида уни Златанга отдим. Бошига санчилишига сал қолди. 10 дақиқа ўтгач душда учрашдик ва бир-биримизга қараб кулдик. Мен унга: “Сени ўлдириб қўйишим мумкин эди” - дедим. Златан эса: “Биламан” деб кулиб юборди», — деди Мидо.