Нигериялик ҳужумчи Виктор Осимхен Италиянинг «Наполи» клубини тарк этишга мажбур қилган сабаблар ҳақида гапириб берди. Унинг фикрича, клуб раҳбарияти берган ваъдаларининг устидан чиқмаган.
«Воқеалар бундай тус олганидан афсусдаман. Айниқса, клуб раҳбариятидан ҳеч қандай изоҳ ололмаган мухлислардан узр сўрайман. Баъзилар ҳатто нима бўлаётганини сўраш учун уйимгача келишди. Шуни айтишим керакки, Тик-Токдаги ўша видеолар эълон қилинганидан кейин орамиздаги ришталар узилди. Ҳар ким хато қилиши, пенальтидан гол ура олмаслиги мумкин. Бу футболчини масхара қилиш учун сабаб эмас.
Мени ирқий камситишди, ваҳоланки клуб раҳбарияти бундай ҳолат бўлмаслигига ваъда берганди. Раҳбарият менинг кетмоқчи эканимни билгач, менга итдек муносабатда бўла бошлашди», — дея Осимхеннинг сўзларини келтиради calcionapoli1926.it.
Ҳозирда Виктор Туркиянинг «Галатасарой» жамоаси шарафини ҳимоя қилмоқда.
