«Манчестер Юнайтед» шартномаси якунлангани сабабли бир йўла уч нафар футболчи жамоани тарк этганини маълум қилди. Улар — Каземиро, Тирелл Маласиа ва Жейдон Санчодир.
Бразилиялик ярим ҳимоячи (Каземиро) манкунианликлар сафида тўрт мавсум ҳаракат қилди. Ушбу давр мобайнида у 160 та учрашувда майдонга тушиб, 26 та гол урди. Каземиро клуб билан биргаликда 2023 йилда Англия лига кубогини ва 2024 йилда Англия кубогини қўлга киритди.
Маласиа 2022 йилдан буён «Манчестер Юнайтед» шарафини ҳимоя қилиб келаётган эди. Ҳимоячи бош жамоа сафида жами 50 та ўйинда қатнашди, якунланган мавсумда эса бор-йўғи уч бор майдонда кўриниш берди.
Санчо 2021 йилнинг ёзида «Олд Траффорд»га кўчиб ўтган эди. Вингер клуб сафида 83 та учрашув ўтказди, шунингдек, фаолияти давомида бошқа жамоаларга ижарага ҳам берилди.
