Nigeriyalik hujumchi Viktor Osimxen Italiyaning «Napoli» klubini tark etishga majbur qilgan sabablar haqida gapirib berdi. Uning fikricha, klub rahbariyati bergan va’dalarining ustidan chiqmagan.

«Voqealar bunday tus olganidan afsusdaman. Ayniqsa, klub rahbariyatidan hech qanday izoh ololmagan muxlislardan uzr so‘rayman. Ba’zilar hatto nima bo‘layotganini so‘rash uchun uyimgacha kelishdi. Shuni aytishim kerakki, Tik-Tokdagi o‘sha videolar e’lon qilinganidan keyin oramizdagi rishtalar uzildi. Har kim xato qilishi, penaltidan gol ura olmasligi mumkin. Bu futbolchini masxara qilish uchun sabab emas.

Meni irqiy kamsitishdi, vaholanki klub rahbariyati bunday holat bo‘lmasligiga va’da bergandi. Rahbariyat mening ketmoqchi ekanimni bilgach, menga itdek munosabatda bo‘la boshlashdi», — deya Osimxenning so‘zlarini keltiradi calcionapoli1926.it.

Hozirda Viktor Turkiyaning «Galatasaroy» jamoasi sharafini himoya qilmoqda.