Диего Симеоне жуда узоқ вақтдан бери «Атлетико» билан ишлаб келмоқда. Аргентиналик мутахассис Мадрид жамоасини 2011 йилнинг декабрь ойи охирида қабул қилиб олган эди. Клуб раҳбарияти Симеоненинг ишидан тўлиқ мамнун ва ҳатто шартномани узайтиришга тайёр.
The Touchline нашрининг хабарига кўра, агар баҳорда «Атлетико» Испания Кубоги ёки бошқа бирор совринни қўлга киритса, клуб Симеонега рад этиб бўлмайдиган шартлар асосида янги таклиф билан чиқади.
«Атлетико» мутасаддилари Симеоне билан бир ёки икки йил ичида яна Чемпионлар лигасида ғолиблик учун даъвогарлик қиладиган жамоа қуриш мумкин деб ҳисоблашмоқда.
Эслатиб ўтамиз, Диего Симеоненинг амалдаги шартномаси 2026/2027 йилги мавсум якунига қадар мўлжалланган.
