Иккинчи даврага пухта тайёргарлик кўрган ва давралар оралиғида ўз сафига олти нафар янги футболчини қўшиб олган “Машъал” жамоаси шубҳасиз, ўз мухлисларини хурсанд қилиши кутилмоқда.
Жамоа сафига келиб қўшилган шундай футболчилардан бири – тажрибали ярим ҳимоячи Мирзакамол Камоловдир. Биз Мирзакамол билан қисқача суҳбат уюштиришга қарор қилдик ва ўзимизни қизиқтирган саволларга жавоб олдик.
-Мирзакамол яқинда сизни Муборакниниг “Машъал” жамоаси билан бир йиллик келишувга эришганингиз ҳақида эшитдик.
-Ҳа шундай. “Оқ-Тепа” жамоасида ўйнаб юрганимда менга клуб вице призиденти Илҳом ака Қурбонов таклиф билан чиқдилар ва мен бунга рози бўлдим, бундан эса хурсандман.
–Нега айнан “Машал”ни танладингиз?
-“Машъал” – жуда курашувчан жамоа, қолаверса фаолиятим давомида воҳаниниг “Насаф” ва “Шўртан” жамоаларида ҳам ўйнашга улгурдим. Умуман менга воҳа футболи бегона эмас қадрдон воҳага қайтганимдан мамнунман. Ўйлайманки, “Машъал”га ҳали кўп ёрдамим тегади, жамоамиз мухлисларини ҳали кўп қувонтирамиз, насиб бўлса.
-Мирзакамол фаолиятингиз давомида юртимизнинг бир қанча кучли жамоаларида тўп тепдингиз сиз учун қайси жамоа қадрлироқ бўлиб қолган?
-Мен фаолиятим давомида “Пахтакор”, “Андижон”, “Насаф”, “Шўртан”, “Қизилқум” жамоаларида ўйнадим. Мен учун энг қадрлиси бу – “Насаф” ва “Андижон” жамоаларидир. Боиси, бу икки жамоада уч йилдан кўпроқ фаолият юритдим мана энди яна олий лигадаман. Ўйлайманки, “Машъал” ҳам мен учун қадрдон жамоага айланади.
-Воҳанинг икки жамоаси “Насаф” ва “Шўртан”да уйнадингиз, мана энди “Машъал” сафида ҳам ўйнайсиз. Сиз бу билан воҳанинг уччала клубида ҳам ўйнаган камдан-кам футболчига айланасиз. Айтингчи, воҳа жамоалариниг бир-биридан фарқи нимада?
-Воҳанинг уччала жамоасининг ҳам ўзига яраша кучли томонлари бор албатта. “Насаф” нафақат юртимизда балки Осиёда ҳам ўзининг мавқеига эга жамоа ҳисобланади. Охирги йилларда “Аждарлар” ҳар томонлама ўсишга эришган жамоалардан биридир, доимий равишда “Насаф”га чемпионлик мақсади қўйилади. “Шўртан” воҳанинг кичик жамоаси бўлишига қарамай профессионаллик бобида чакки эмас. Биринчи даврада ғузорликлар “Пахтакор”ни не аҳволга солганини барча мухлислар яхши хотирлайди. “Оқ бўрилар”га ҳам кучли саккизликка кириш мақсади қўйилади. Клубга янги раҳбар келгач, жуда катта ижобий ўзгаришларга қўл урилаётганини эшитаяпман. Энди “Машъал” ҳақида барча билади. Бу ерда тарбияланиб, вояга етган юлдузлар бугунги кунда мамлакатимиз чемпионатида ва хорижда тўп тепмоқда. Улар шунингдек турли ёшдаги мамлакатимиз терма жамоалари сафида ҳам ўйнаб келишмоқда. “Машъал”нинг яна бир ёқимли “одати” бор – кутилмаганда кучли жамоаларни мағлубиятга учратиб, мухлисларни қойил қолдиради. Бунга мисол қилиб, бу йилги футбол мавсумида ҳеч кимдан мағлуб бўлмаган, “Локомотив” жамоасини таслим этилишини айтиш мумкин.
Қолаверса, юқори лигада вилоятнинг учта жамоасининг иштирок этиши бу -вилоятда футболга бўлган эътибор юқорилигидан далолат беради, бунинг қадрига етиш керак.
-Сизга бошқа жамоалрдан ҳам таклиф бўлганмиди?
-Ҳа таклиф бўлганди ва мен Муборакка келишни маъқул кўрдим, Қайси жамоалар эканини энди айтиш жоиз эмас деб, ўйлайман.
–Бу ердаги шароитлар сизга маъқул бўлдими?
-“Машъал”даги яратилган шароитларга қойил қоласан киши. Кулубнинг ишчи – хизматчиларидан тортиб футболчиларигача бирдек аҳил. Бир сўз билан айтсам, “Машал”га келганимдан хурсандман.
-“Машъал”нинг таркибидаги энг кучли футболчи деб, кимни кўрсатган бўлардингиз?
-Янги жамоамда кучли футболчилар кўпчиликни ташкил этади, шахсан ўзимга Шахзод Шайманов ва Жавоҳир Илёсовларни ўйини ёқади. Умуман “Машал”даги футболчиларнинг кўпи МТЖ сафида ҳам ўйнашга қодирлар, бу албатта менинг шахсий фикрим.
-Суҳбатимиз сўнгида, ҳар доимгидек “Машъал” мухлисларига ҳамда voha.uz сайти ижодкорларига тилакларингиз?
-Мубораклик мухлисларга тилагим, уларни биринчи ўринда бахт ва омад тарк этмасин, бизни ўйингоҳга келиб, чин юракдан қўллаб – қувватлашсин. Ўйлайманки, ҳаммаси яхши бўлади. Voha.uz сайти ижодкорларига эса, улкан муваффақиятлар тилайман, энг кўзга кўринган сайтлардан бири бўлишига тилакдошман.
-Мирзакамол мазмунли суҳбат ва чиройли тилакларингиз учун ташаккур.
-Сизларга ҳам эътиборларингиз учун раҳмат.
Суҳбатни Дилшод Сафаров ёзиб олди.
Манба: voha.uz
