Енгил атлетика бўйича АҚШ терма жамоаси аъзоси Эбби Д’Агостино югуриш йўлакчасига йиқилган Янги зеландиялик рақиби Никки Хэмблинга ўрнидан туришга ёрдам берди. Воқеа 16 август куни, Рио–2016 Олимпиадасининг 5 000 метрга югуриш баҳсларида бўлиб ўтди, деб хабар бермоқда TJournal.

Хэмблин америкалик Д’Агостинонинг оёғи остида йиқилди ва рақибига қоқилиб, у ҳам йиқилди. АҚШ вакиласи ўз ўрнидан дарров туриб, Янги зеландиялик спортчига туришга ёрдам берди.

Йиқилиш натижасида оёғини шикастлаган Д’Агостино югуришни шу заҳоти давом эттира олмади ва бу сафар унга Хэмблин ёрдам қўлини чўзди.

Америкалик енгил атлетикачи бир амаллаб финишга етиб борди ва шундан сўнг унга тиббий ёрдам кўрсатилди.

Хэмблин қандай қилиб ерга йиқилганини тушунмай қолди. Журналистлар билан суҳбатда у америкалик ҳамкасби билан таниш эмаслигини айтди. Финишга етиб келганидан сўнг Никки Хэмблин рақибасини қучоқлаб, ёрдам учун миннатдорлик билдирди.

Ижтимоий тармоқларда ҳодисага муносабат билдирган фойдаланувчилар воқеа «Олимпия руҳи» намунаси эканини таъкидлади. Ҳар икки спортчига финал босқичида иштирок этиш учун рухсат берилди.