Навоийда “Гўзал ва бетакроримсан, муқаддас Ватаним, жоним сенга фидо, Ўзбекистоним!” шиори остида футбол бўйича қизлар ўртасида “Яшил майдон маликалари” мусобақасининг мамлакат босқичи бўлиб ўтди. 

Президентимиз раҳнамолигида хотин-қизлар ўртасида спортнинг оммавийлигини ошириш, уларнинг спорт билан мунтазам шуғулланиши учун замонавий шароит яратиш борасида амалга оширилаётган ишлар юксак самаралар бераётгани таъкидланди. Бу ёшлар, айниқса, қизларнинг соғлом ва баркамол вояга етишида муҳим аҳамият касб этмоқда. 

Давлатимиз раҳбарининг 2014 йил 6 февралдаги “Ўзбекистон Республикасида ёшларга оид давлат сиёсатини амалга оширишга қаратилган қўшимча чора-тадбирлар тўғрисида”ги қарори ижроси доирасида Маданият ва спорт ишлари вазирлиги, Хотин-қизлар қўмитаси, Навоий вилояти ҳокимлиги ва бошқа ташкилотлар ҳамкорлигида ташкил этилган мусобақада Қорақалпоғистон Республикаси, Тошкент, Сурхондарё ва Навоий вилояти жамоалари ғолиблик учун баҳслашди. 

Сурхондарёлик футболчи қизлар биринчи ўринни эгаллади ва бош совринни қўлга киритди. Иккинчи, учинчи ўринлар Қорақалпоғистон Республикаси ва Тошкент вилояти жамоаларига насиб этди. 

– Мусобақада ғалаба қозониш осон бўлмади, – дейди Сурхондарё вилояти жамоаси сардори Нигора Муҳаммадиева. – Мамлакатимизда хотин-қизларни спортга жалб этишга қаратилаётган алоҳида эътибор айниқса қизларга кенг имкониятлар яратмоқда. Бугунги мусобақа ҳам хотин-қизлар ўртасида спортнинг оммавийлигини ошириш ва соғлом турмуш тарзини тарғиб этишга қаратилгани билан аҳамиятлидир.