Россия терма жамоасининг Рио-де-Жанейро шаҳрида 7–18 сентябрь кунлари бўлиб ўтадиган Паралимпия ўйинларидан четлаштирилиши натижасида австралиялик паралимпиячилар қўшимча 9 та лицензияга эга бўлди. Бу ҳақда Халқаро паралимпия қўмитаси (ХПҚ) расмий сайти маълум қилди, деб хабар бермоқда «Интерфакс».

Қўшимча лицензияларни голбол бўйича Австралия аёллар терма жамоаси, теннисчи ва икки нафар енгил атлетикачи қўлга киритди.

Аввалроқ россиялик паралимпиячиларнинг 22 та лицензияси АҚШ терма жамоасига берилгани маълум бўлганди.

23 август куни Спорт арбитраж суди (CAS) Россия паралимпия термасига 7–18 сентябрь кунлари Рио-де-Жанейрода бўлиб ўтадиган Паралимпия ўйинларида иштирок этиш учун Халқаро паралимпия қўмитасининг россияликларга нисбатан қўллаган қарорига апелляциясини қониқтирмаган эди.

26 август куни Россия паралимпия қўмитаси (РПҚ) президенти Владимир Лукин Лозаннадаги Спорт арбитраж суди (CAS)нинг россиялик спортчиларни Рио-де-Жанейро шаҳрида бўлиб ўтадиган Паралимпия ўйинларидан четлаштириш қарорига Швейцария федерал судига апелляция бергани ҳақидахабар қилинганди.

Аввалроқ Халқаро паралимпия қўмитаси 35 нафар россиялик имконияти чекланган спортчиларни халқаро мусобақалардан четлатишга қарор қабул қилиб бўлганди. Бунга асосий сабаб сифатида Халқаро антидопинг агентлиги (WADA)нинг мустақил комиссияси раҳбари Ричард Макларен томонидан спортдаги допинг ҳақида тақдим қилинган ҳисоботи кўрсатилмоқда.