«Динамо» - «Орол» (6:1) учрашувида ўйиннинг энг фаол ўйинчиларидан бири бўлган самарқандликлар сардори Акмал Бозоров ҳимоячи бўлишига қарамай, шу куни ҳужумкор тўп суриб, ажойиб голга муаллифлик қилди.

Ўйиндан кейин жамоа сардори клуб расмий сайтига ўйин борасидаги фикрлари билан ўртоқлашди.

- «Орол» жамоаси сўнгги икки ўйинда рақиблар дарвозасига 14 та гол урганидан хабаримиз бор эди. Бу рақибга қарши ҳимояда ишончли ўйнаб, ҳужумда самаралироқ тўп суришимиз талаб этиларди. Ўйлайманки, ўйинда киритган тезкор голимиз йирик ҳисобдаги ғалабамиз учун катта ёрдам берди» - дея гап бошлади Акмал Бозоров.

- 6:1 ҳисобидаги ғалаба билан якунланган ўйинни «Динамо»нинг жорий йилдаги энг чиройли ўйини деса бўладими?

- Бутун жамоамиз мураббийлар кўрсатмасини тўғри бажаришга интилди. Чинданам энг яхши ўйинларимиздан бирини кўрсатдик деб ўйлайман. Қолган ўйинларда ҳам мана шу «темп»ни сақлаган ҳолда тўп сурсак, мақсадимизга етишамиз.

- «Динамо»нинг ғалабали серияси 23 ўйинга етди. Жамоа 70 очко жамғариб, яқин таъқибчисини 8 очкога ортда қолдирмоқда. Қолаверса, захирада яна битта ўйин бор. Шундан келиб чиқиб, «Динамо» Олий Лига масаласини амалда ҳал этди, деса бўладими?

- Бу фикрга қўшилмаган бўлардим. «Динамо» Олий Лигага чиқди дейишга ҳали эрта. Чунки олдинда яна 7 та ўйин бор. Ушбу баҳслар асосий рақобатчиларимизга қарши ўтади. Шундай экан, айни дамдаги 8 очколик фарқ унчалик катта эмас, деб ўйлайман. Қолган баҳсларда ҳам ҳушёрликни йўқотмай, фақат ғалаба учун тўп суришда давом этишимиз шарт. Мухлисларларимиз доимгидек қўллаб-қувватлаб туришса, «Динамо» билан яна Олий Лигага қайтамиз.

Усмон ИБОДОВ суҳбатлашди.