Терма жамоаларнинг жаҳон чемпионатига чиқиш учун ўтказган саралаш ўйинларидан кейин Европа клубларининг ички чемпионат навбатдаги турларига старт берилди. Ушбу дам олиш кунларида шубҳасиз энг қизиқарли ва кўп эътибор тортадиган ўйин Энфилд стадионида бўлиб ўтади. АПЛ 8-тур доирасида маҳаллий «Ливерпул» клуби ўзининг азалий рақиби бўлмиш «Манчестер Юнайтед»га қарши чиқади.
Бу икки жамоалар орасидаги рақиблик қадим тарихга бориб тақалади. Янги асрда чемпионликка даъвогар жамоалар сони кўпайган бўлсада, уларнинг орасидаги зиддиятлар умуман йўқолмаган. Ҳали ҳануз бу икки топ клуб бир-бирини хушламайди, бу ҳолат уларнинг муҳлисларига ҳам ўз таъсирини ўтказмай қолмади.
«Ливерпул» бу ўйинга йўқотишларсиз келди. «Ливерпул» бошқарувига моҳир мураббий Юрген Клопп келганидан бери жамоа яна ўзини тиклаб олмокда. Бунга мисол қилиб, уларнинг чемпионат бошлангандан буён “Арсенал” ва “Челси” жамоаларини мехмонда мағлуб қилганини келтиришимиз мумкин. Колаверса, ўтган йилги АПЛ чемпиони “Лестер” хам мағлуб этилди. Сўнгги ўйинларида «Ливерпул» ўта тезкор ўйин намойиш этмоқда. Шу нарсага эътибор қаратиш керакки, «Ливерпул» футболчилари ўйин давомида кўп ўрин алмашишади. Коутиньё ва Мане қанот футболчилари бўлсаларда, марказда тўп сурадиган Фирминьо билан ўйин давомида кўп маротаба жой алмашишади. Бу рақиб ҳимоячилари, таянч ярим ҳимоячиларни ҳамда ўйинга керакли тактика танлаган рақиб жамоа мураббийини хам чалғитиши шубҳасиз. Таъкидлаб ўтиш лозимки, футболчилар ўз ўринларини ўзгартирганларида ҳам янги позицияга тезда мослашиб кетишмокда ва янада аъло уйин кўрсатишмокда. Жамоанинг қанот ҳимоячилари ҳам хужумларга қўшилиб «Ливерпул» ўйинига ўзгача тезкорлик ва рангбаранглик олиб киришмоқда. Шубҳасиз, бу ўйинда «Манчестер Юнайтед» ҳимоячилари “ишсиз” қолишмайди. Мукаммал кўринган «Ливерпул» жамоасининг энг катта камчилиги уйинларида баъзан стабилликнинг етишмаслигидир. Жамоа ҳар доим ҳам юқори даражада ўйин ўтказмаган.
Шубҳасиз, «Манчестер Юнайтед» трансфер ойнасининг энг фаол иштирокчиси бўлди. Златан Ибрагимович ва Поль Погбадек ҳужумчи ва ҳимоячилар ҳар қандай жамоани кучайтириши мумкин бўлган ўйинчилар сирасига киради. Лекин хозирда Поль Погба унинг учун тўланаётган пулларга арзий олишини кўрсата олмаяпти. Унинг Ювентусдаги ўйинларини биз ҳали АПЛда кўрмаяпмиз. Ҳозирча у ўртамиёна ўйин кўрсатмоқда. Златан Ибрагимович, шубҳасиз, охирги йилларнинг энг кучли ҳужумчиларидан бири. Лекин у ҳам чемпионатнинг бошида киритган голларидан кейин айтарли кўзга ташланмаяпти. Ҳозирча «Манчестер Юнайтед» таркибида Хуан Мата ва Люк Шоуларга эътирозлар йўқ, қолганлар еса ҳали юқори даражадаги ўйинларини тиклаб олишмади. Люк Шоу жароҳати сабабли бу ўйинда ўз жамоасига ёрдам беролмаслигининг эҳтимоли катта. Шуни эътироф етиш керакки, Златан ва Погба кучли футболчилар ҳисобланишади ва улар ҳали ўз ўйинларини кучайтиришади. Бунга шубҳа йўқ. Балки, Энфилддаги ўйин бунга замин яратар. Жамоа сардори Руни эса бу ўйинни яна заҳирада бошлаши мумкин. Бунга сабаб, уни охирги ўйинларда кўрсатаётган натижаларидадир. Бу ўйинда Жозе Моуриньо жамоани тезкор суратга асосланган тактика билан “Ливерпул”га қарши майдонга тушириши керак. Албатта, у тактик жиҳатдан жамоани турнинг марказий учрашувига тайёрлаган. Лекин унинг қайси футболчилари тезкор равишда “Ливерпул”га қаршилик кўрсата олишаркан. Люк Шоу ва Генрих Мхитирян каби тезкор ва креатив футболчиларнинг бу баҳсни ўтказиб юбориш эҳтимоли жамоа бош мураббийига қўшимча қийинчилик туғдирмоқда. Яна бир ҳолатни кўздан қочирмаслигимиз керакки, “Манчестер Юнайтед” таркибида Генрихнинг ўрнини босадиган футболчилар албатта бор. Мисол учун, Марсьял бу ишни бемалол уддалайди. Люк Шоу ўрнига футболчи топиш эса ҳозирги ҳимоя футболчилари билан муаммо. Жозе бу вазиятдан қандай чиқиб кетаркан-вақт кўрсатади.
Менинг фикримча, бу ўйинда «Ливерпул» активроқ ва биринчи рақам билан ўйнашга ҳаракат қилади. «Ливерпул»нинг тезкор ҳужумчилари ва қанот ҳимоячилари «Манчестер Юнайтед»нинг қанот футболчиларига бутун ўйин давомида босим ўтказиб туришади. “Қизил иблислар” эса ўз бахтини қарши ҳужумларда синаши мумкин. Уларнинг қарши ҳужумлари ҳавфли чиқиши тайин. Чунки Жозе жамоаси қарши ҳужумларда ажойиб ўйин кўрсатади. Стандартлар ҳақида ҳам эсдан чиқармаслик керак. Ахир манчестерликлар таркибида иккинчи қаватда яхши ўйнайдиган футболчилар етарлича топилади.
Бўлажак ўйин натижалари ҳақида тахминларга келадиган бўлсак, «Ливерпул» ғалабасига 60%, «Манчестер Юнайтед» ғалабасига 10% имконият тақсимласак бўлади. Бу ўчрашувда 30% дуранг натижа кутишимиз мумкин.
Албатта, бу футбол, унда кутилмаган натижалар жуда кўп бўлиб туради. Шу сабабли ҳам миллионлаб одамлар футболнинг ишқибози бўлса керак.
Хуршид Қаҳҳоров
