3 ноябрь куни Москванинг Черкизово туманида болалар ўртасида Loko Cup-2016 халқаро турнири старт олади.
Унда Россия, Ўзбекистон ва Озарбайжондан ташриф буюрган жами 22 клуб иштирок этади. Тошкентнинг «Локомотив» клубининг 2007 ва 2008 йилда туғилган ёшлари бу мусобақада юртимиз шарафини ҳимоя қилишади.
Турнирда футбол беллашувларидан ташқари, «Локомотив» фахрийлари, футболчилари ва мураббийлари билан учрашувлар, мастер-класслар, автограф-сессиялар амалга оширилади. Бундан ташқари Москванинг «Локомотив» клуби стадиони ва музейига экскурсия уюштирилади. Шунингдек ёш футболчилар «Локомотив» — «Анжи» ўйинини томоша қилиш учун стадионга ташриф буюришади.
Мусобақанинг очилиш маросими эртага, соат 10:00да ўтказилади. Ҳал қилувчи ўйинлар 5 - 6 ноябрь кунлари ўтказилади. Совриндорларни тақдирлаш маросими 6 ноябрь куни соат 15:30да бўлиб ўтади.
