Ўзбекистон миллий терма жамоаси сардори Одил Аҳмедовнинг Пекин клиникикаларидан бирида тиббий кўрикдан ўтаётгани ҳақидаги хабар «Спортфакт»га асосланиб тақдим этилганди. Футболчига яқин манбаларнинг қайд этишича, Аҳмедов айни вақтда Хитойда эмас, балки ўзи туғилиб ўсган Наманганда бўлиб турибди.

Аҳмедов 8 декабрь куни «Краснодар» сафида «Ницца»га қарши ўйинда иштирок этган. Кейинроқ эса юзага келган танаффусдан фойдаланиб, Наманганга ташриф буюрган.

Аввалроқ футболчига Хитойнинг «Шандонг Луненг» клуби қизиқиш билдираётгани айтилган бўлиб, «Краснодар» бунинг орқасидан 8 миллион евро ишлаши мумкинлиги хабар қилинганди.

Кўринишидан, Хитой клубининг Одил Аҳмедовга таклиф билан чиққани рост. Бироқ музокаралар ҳали якунига етмаган. У айнан «Шандонг Луненг» таркибига бориб қўшиладими ёки Хитойнинг бошқа клубида кўриниш берадими, маълум эмас.

Маълумот учун, Хитой Супер Лигасида Ўзбекистон миллий терма жамоаси ҳимоячилари ҳисобланган Егор Кримец ва Анзур Исмоилов тўп тепади. Игорь Сергеев эса «Бейцзинг Гоан»даги ярим йилликдан сўнг ортга қайтгани айтилган. Аҳмедов бу борада айни вақтда Хитойда ўйнаётган учинчи ўзбекистонлик бўлиши мумкин.