Кетма-кет 9-марта ЖЧ финал босқичида қатнашишни режалаштираётган Жанубий Корея терма жамоаси муаммолар гирдобида қолди. 23 март куни корейслар Хитойга қарши сафар ўйинини ўтказиб, 28 март куни Сеулда Сурия терма жамоасини меҳмон қилади.

Асосий қуроли Европада тўп сурадиган легионерлар ҳисобланган Жанубий Корея Хитойга кучсизланган таркибда бориши кутилмоқда. Англия премьер-лигасининг “Суонси” клубида тўп сурувчи терма жамоа сардори Ки Сонг Йонг ва Германия бундеслигаси аъзоси – “Аугсбург” футболчиси Ку Жа Чол жароҳатлари сабаб терма жамоага ёрдам бера олмасликлари эҳтимоли юқори.

Ки Сонг Йонг 10 февраль куни жароҳати сабаб клуб базасини тарк этганлиги хабар қилинган бўлса, Ку Жа Чол 5 февраль куни ўз клуби сафида “Вердер”га қарши ўйинда 1 гол ва 1 голли узатма қайд этган ҳолда жароҳат ҳам олди. Иккала футболчи ҳам мартнинг охирларига қадар сафга қайта олмайди.

Бунинг устига “Тоттенҳэм” ҳужумчиси Сонг Хеунг Мин ўтган турда Ўзбекистонга қарши ўйинда сариқ карточка олганлиги сабаб Хитой билан бўладиган ўйинда терма жамоасига ёрдам бера олмайди.

Ўз навбатида Хитой ўз уйида ўтадиган Жанубий Кореяга қарши ўйинга ҳаёт-мамот масаласидек жиддий тайёргарлик кўрмоқда. Хитойликлар 9 февралдан бошлаб Гвангжоуда йиғин ўтказишмоқда. Ўтган йил октябрь ойида бош мураббийликка тайинланганидан буён Марчелло Липпи учинчи йиғинни ўтказмоқда. 23 март куни Хитой қандай бўлмасин Жанубий Кореяни мағлуб этишга уриниши кутилмоқда.

Корейс ОАВлари маълумотлари асосида Отабек Йўлдошев тайёрлади.