Осиё Чемпионлар Лигаси “С” гуруҳи 2-туридан ўрин олган “Бунёдкор” – “Ал-Айн” (2:3) учрашувидан кейин ўтказилган матбуот анжуманида “қалдирғочлар” бош мураббийи Сергей Лучшан ўйин борасида ўз фикрлари айтиб ўтди.

“Бугунги ўйинда бизни қўллаб-қувватлаган барчага миннатдорчилик билдираман. Кучли рақиб билан ўйнадик ва ютқзадик. Рақиб ҳозирги кунда биздан кучлироқ. Акрам Комилов билан юз берган ҳолат биринчи марта такрорланмаяпти. Машғулотларда унга барчаси тушунтирилади, у билан иш олиб борилади, аммо вазият яна ўша-ўша. Шунга қарамай у жуда меҳнаткаш йигит. 

Умуман олганда ўйинда турли жараёнлар кузатилди. Тезкор голлар, қизил карточка, пенальти... Рақибнинг тажрибаси уларга қўл келди. Аввал айтиб ўтганимдек, “Ал-Айн”да кучли футболчилар талайгина. Ёшларга урғу қаратишда давом этяпмиз, рақиб эса маҳорат эвазига ғалаба қозонди”, – деди Сергей Лучшан. 

Эслатиб ўтамиз, “Бунёдкор” ОЧЛ-2017 турнирида қаторасига иккинчи мағлубиятни қабул қилиб олди ва ҳозирча ҳеч қанча очкога эга эмас.