Osiyo Chempionlar Ligasi “S” guruhi 2-turidan o‘rin olgan “Bunyodkor” – “Al-Ayn” (2:3) uchrashuvidan keyin o‘tkazilgan matbuot anjumanida “qaldirg‘ochlar” bosh murabbiyi Sergey Luchshan o‘yin borasida o‘z fikrlari aytib o‘tdi.
“Bugungi o‘yinda bizni qo‘llab-quvvatlagan barchaga minnatdorchilik bildiraman. Kuchli raqib bilan o‘ynadik va yutqzadik. Raqib hozirgi kunda bizdan kuchliroq. Akram Komilov bilan yuz bergan holat birinchi marta takrorlanmayapti. Mashg‘ulotlarda unga barchasi tushuntiriladi, u bilan ish olib boriladi, ammo vaziyat yana o‘sha-o‘sha. Shunga qaramay u juda mehnatkash yigit.
Umuman olganda o‘yinda turli jarayonlar kuzatildi. Tezkor gollar, qizil kartochka, penalti... Raqibning tajribasi ularga qo‘l keldi. Avval aytib o‘tganimdek, “Al-Ayn”da kuchli futbolchilar talaygina. Yoshlarga urg‘u qaratishda davom etyapmiz, raqib esa mahorat evaziga g‘alaba qozondi”, – dedi Sergey Luchshan.
Eslatib o‘tamiz, “Bunyodkor” OCHL-2017 turnirida qatorasiga ikkinchi mag‘lubiyatni qabul qilib oldi va hozircha hech qancha ochkoga ega emas.
