Madridning «Real» klubi yarim himoyachisi Arda Gyuler hujumchi Gonsalo Garsiyaning jamoadan ketganiga munosabat bildirdi.
22 yoshli ispaniyalik futbolchi doimiy o‘yin amaliyotiga ega bo‘lish maqsadida qadrdon klubini tark etib, Angliyaning «Fulhem» klubiga o‘tishga qaror qildi. Transfer haqida dushanba kuni rasman e’lon qilindi.
«Maydonda ko‘rsatgan mahorating va maydondan tashqaridagi do‘stliging uchun rahmat. Kamtar, mehnatkash va yaxshi inson — sen haqingda hamisha shunday fikrda bo‘laman. Sen akademiyadan to asosiy jamoagacha bo‘lgan yo‘lni bosib o‘tding va bularning barchasiga haqli ravishda erishding. Kiyinish xonasidagi qo‘shnimni sog‘inaman. Omad, birodarim. Seni hamisha qo‘llab-quvvatlayman», — deb yozdi Gyuler ijtimoiy tarmoqdagi sahifasida Garsiyaga qarata.
«Real» o‘z tarbiyalanuvchisining sotuvidan 40 million yevro ishlab oldi.
