18 март куни Бутунжаҳон бокс серияси (WSB) «C» гуруҳи 4-турида Uzbek Tigers жамоаси Тошкентда Хитойнинг China Dragons боксчилари билан тўқнаш келади.
Бўлажак бокс оқшомида Ўзбекистон жамоаси таркибида рингга кўтариладиган чарм қўлқоп усталари маълум бўлди.
Эътиборга молик жиҳати шундаки, бўлажак беллашувларда Uzbek Tigers шарафини Қозоғистоннинг Astana Arlans жамоасига қарши (1:4) кечган жанглардаги боксчилар ҳимоя қилади.
Uzbek Tigers жамоаси таркиби қуйидагича:
-52 килограмм: Аброржон Қодиров;
-60 килограмм: Муроджон Аҳмадалиев;
-69 килограмм: Шаҳрам Ғиёсов;
-81 килограмм: Бектемир Мелиқўзиев;
+91 килограмм: Баҳодир Жалолов.
Эслатиб ўтамиз, WSB доирасида Uzbek Tigers 2017 йил ҳисобидан учта жанг ўтказди. Ўзбекистонлик бошчилар аввалига Хитойда China Dragons’дан 2:3 ҳисобида енгилган бўлса, кейинроқ Қозоғистонда Astana Arlans’га 1:4 ҳисобида имкониятни бой берганди. Тошкентда бўлиб ўтган 3-турда Uzbek Tigers Россиянинг Patriot Boxing Team жамоасини 5:0 ҳисобида таслим қилганди.
Маълумот учун, гуруҳдаги иккинчи жуфтлик – Қозоғистоннинг Astana Arlans жамоаси 18 март куни кетма-кет учинчи марта ўз уйида жанг қилади. Қозоғистонлик боксчилар Россиянинг Patriot Boxing Team жамоаси вакилларини қабул қилади.
