Шу йилнинг 13-17 март кунлари Озарбайжон пойтахти Боку шаҳрида Европа бокс конфедерацияси ва Озарбайжон бокс федерацияси ҳамкорлигида "Буюк ипак йўли - 2017" халқаро турнири бўлиб ўтади.

Ушбу нуфузли мусобақада Европа ва Осиё қитъасидан энг кучли боксчилар ташриф буюришади.

Мусобақада Ўзбекистон терма жамоасининг етти нафар боксчиси қатнашашиши кутилмоқда.

Ўзбекистон бокс федерацияси матбуот хизмати хабар беришича, нуфузли мусобақада қуйидаги таркиб иштирок этади: Мироншоҳ Иброҳимов (-49 кг), Сирожиддин Ғуломжонов (-52 кг), Иқболжон Холдоров (-64 кг), Фазлиддин Мелибоэв (-69 кг), Маҳмуд Ғоипов (-75 кг), Мадиёр Саидраҳимов (-81 кг), Сардор Бегалиэв (-91 кг).

Турнирда қатнашадиган боксчиларимизга Олимпия ўйинлари совриндорлари - Рустам Саидов ва Ўткирбек Ҳайдаров мураббийлик қилади.

Ўзбекистон терма жамоаси бугун тонгда Озарбайжон пойтахти Боку шаҳрига учиб кетди.