Тошкентнинг «Бунёдкор» клуби Чемпионлар лигаси гуруҳ босқичининг кетма-кет 15 та ўйинида ғалаба қозона олмади ҳамда клуб антирекордлари сериясини яна-да узайтирди. Бунга «қалдирғочлар» бош мураббий Сергей Лушчан бошқарувида «муваффақ» бўлди.

«Бунёдкор» Чемпионлар лигасининг гуруҳ босқичида сўнгги бор 2014 йилнинг апрель ойида зафар қучган бўлиб, ўшанда клубни Александр Волков бошқараётганди. Кейинроқ «Бунёдкор» гуруҳни муваффақиятли якунлашга эришганди.

Кейинги икки мавсумда эса жамоага Сергей Лушчан устозлик қилди ва «Бунёдкор» ҳар иккисида ҳам гуруҳда қолиб кетди. Ваҳоланки клуб бунга қадар мусобақадаги барча иштирокида гуруҳ босқичини муваффақиятли босиб ўтганди.

2015 ва 2016 йилги мавсумларда «Бунёдкор» гуруҳ босқичида жами 12 та учрашув ўтказиб, шуларнинг 4 тасида дуранг ўйнади ва 8 тасида имкониятни бой берди. 2017 йилга келиб эса бу қора анъана давом этди ҳамда «қалдирғочлар» гуруҳ босқичини кетма-кет уч мағлубият билан бошлади.

Сергей Лушчан ОЧЛ гуруҳ босқичида 15 та ўйин ўтказган бўлиб, шуларнинг 11 тасида имкониятни бой берган ва биттасида ҳам зафар қучмаган.

Маълумот учун, Сергей Лушчан бошқарувида «Бунёдкор» Ўзбекистон чемпионатида икки бор 4-ўринни эгаллаган (2014 ва 2015 йиллар). Бунга қадар «қалдирғочлар» 2-ўриндан пастга тушмаган бўлиб, Лушчан раҳбарлигида кучли учликка ҳам кира олмаганди.

Сергей Лушчан ОЧЛ гуруҳ босқичида ҳеч бўлмаганда 1 та беллашувни дуранг билан якунлай олган. 2017 йилги мавсумда «Бунёдкор» барча ўйинда мағлуб бўлиб, яна бир антирекордини ўрнатиши ҳам мумкин.