Осиё қитъасида ЖЧ-2018 саралаш босқичи доирасида гуруҳимизда дастлабки ўйин якунига етди.

Очко йўқотишга ҳақи қолмаган Жанубий Корея терма жамоаси ўйиннинг 4-дақиқасидаёқ ҳисобни очишга муваффақ бўлди. Тўп бурчакдан ўйинга киритилган пайтда ҳимоячи Хонг Жеонг-Хога келиб тушди ва 10 метрлардан дарвозани ишғол қилди.

Ушбу гол Ули Штилике шогирдларининг кайфиятини кўтарди ва мезбонлар танаффусга қадар ташаббусни ўз томонларида ушлаб туришди.

Иккинчи бўлимда сурияликлар тезликни оширишди ҳамда кучли рақиб дарвозаси олдида бир нечта вазиятларни яратишга муваффақ бўлишди. Айниқса, тажрибали Фирас ал-Хатиб дарвозабон билан бирга-бир вазиятга чиқиб кучли зарба йўллади. Тўп кореялик посбоннинг юзига тегиб қайтди.

Қўшиб берилган дақиқаларда эса Сурия дурангга эришиши мумкин эди, аммо яна ўша Ал-Хатиб яқин масофадан берилган зарба натижасида тўп тўсинга қайтди.

Тўғри, кореяликлар ҳам иккинчи бўлимда 1-2та қулай имкониятлардан фойдалана олмади. Шунга қарамай, Жанубий Корея катта қийинчилик ва омад туфайли 3 очкони қўлга киритди.

Ушбу ғалабадан кейин Корея ўз очколарини 13тага етказиб олди. Сурия эса 8 очко билан қоладиган бўлди.

ЖЧ-2018 саралаш. Осиё, "А" гуруҳи, 7-тур, 16:00
ЖАНУБИЙ КОРЕЯ - СУРИЯ 1:0
Гол: Хонг Жеонг-Хо (4)