Osiyo qit’asida JCH-2018 saralash bosqichi doirasida guruhimizda dastlabki o‘yin yakuniga yetdi.

Ochko yo‘qotishga haqi qolmagan Janubiy Koreya terma jamoasi o‘yinning 4-daqiqasidayoq hisobni ochishga muvaffaq bo‘ldi. To‘p burchakdan o‘yinga kiritilgan paytda himoyachi Xong Jeong-Xoga kelib tushdi va 10 metrlardan darvozani ishg‘ol qildi.

Ushbu gol Uli Shtilike shogirdlarining kayfiyatini ko‘tardi va mezbonlar tanaffusga qadar tashabbusni o‘z tomonlarida ushlab turishdi.

Ikkinchi bo‘limda suriyaliklar tezlikni oshirishdi hamda kuchli raqib darvozasi oldida bir nechta vaziyatlarni yaratishga muvaffaq bo‘lishdi. Ayniqsa, tajribali Firas al-Xatib darvozabon bilan birga-bir vaziyatga chiqib kuchli zarba yo‘lladi. To‘p koreyalik posbonning yuziga tegib qaytdi.

Qo‘shib berilgan daqiqalarda esa Suriya durangga erishishi mumkin edi, ammo yana o‘sha Al-Xatib yaqin masofadan berilgan zarba natijasida to‘p to‘singa qaytdi.

To‘g‘ri, koreyaliklar ham ikkinchi bo‘limda 1-2ta qulay imkoniyatlardan foydalana olmadi. Shunga qaramay, Janubiy Koreya katta qiyinchilik va omad tufayli 3 ochkoni qo‘lga kiritdi.

Ushbu g‘alabadan keyin Koreya o‘z ochkolarini 13taga yetkazib oldi. Suriya esa 8 ochko bilan qoladigan bo‘ldi.

JCH-2018 saralash. Osiyo, "A" guruhi, 7-tur, 16:00
JANUBIY KOREYA - SURIYA 1:0
Gol: Xong Jeong-Xo (4)