"Ливерпул" жамоаси ҳужумчиси Садио Мане тиззасидаги жароҳат туфайли бу мавсум бошқа майдонга тушмаслиги мумкин.
Мерсисайдликлар футболчиси "Эвертон"га қарши баҳснинг иккинчи таймида жароҳат олиб, Дивок Оригига алмаштирилган эди.
Бугун текширув натижаларидан кейин аниқ хулоса чиқиши керак. Лекин Садио Мане яқин кунлар давомида жамоасига Чемпионлар лигаси йўлланмаси учун курашда ёрдам бера олмаслиги аниқ. Футболчининг жароҳат олган оёғидаги шиш ҳали ҳам қайтмаган. Айни шу сабаб текшириш ишларини ҳам тўлақонли даражада ўтказиш имкони бўлмаслиги мумкин.
Ҳозирча Мане "Борнмут"га қарши баҳсда майдонга тушмасли аниқ бўлиб турибди. Бу ҳақида жамоа бош мураббийи Юрген Клопп айтиб ўтди. У шунингдек, сенегаллик футболчининг жароҳати жиддий бўлиб чиқмаслигини ва Мане тезроқ сафга қайтишини тилади.
24 ёшли Садио бу мавсумда "Ливерпул"нинг энг муҳим футболчиларидан бўлиб турибди. У АПЛнинг 27та турида майдонга тушиб 13та гол уришга муваффақ бўлди.
