19 июл куни Стратегик ишчи гуруҳи томонидан ўтказилган йиғилишда бу система 2018 йилдан ишга туширилиши ҳақида келишиб олинди.
Ҳало системасига пойгаларда қатнашадиган 10та жамоадан 9таси қаршилик қилган бўлишига қарамай шундай қарор тасдиқланди.
Пилот бошини ҳимоя қилишнинг Ҳало тизими 2016 йилда мавсумолди тест пойгалари мобайнида Феррари жамоаси пилотлари Кими Райкконен ва Себастян Феттел томонидан синаб кўрилган эди. Ҳало ҳимоя тизими конструкцияси кокпит ёнлари ва пилотнинг олдидаги учта бириктирув нуқтасига эга ёй шакли кўринишида бўлади.
Мазкур йиғинда, шунингдек, "Қалқон" деб аталган, пилот бошини ҳимояловчи бошқа бир тизим ҳам кўриб чиқилган. У кокпит олдига ўрнатиладиган шаффоф қубба шаклида бўлган. Бу тизимни яқинда бўлиб ўтган Британия гран-присида Себастян Феттел синаб кўрган. Пойгачининг сўзларига кўра, "қалқон"ли машина билан трассада юриб кўргач, унинг боши айланган ва у билан болидни бошқариш оддатдагидан бирмунча қийин бўлишини таъкидлаган.
Формула 1 пойгалари иштирокчилари Ҳало тизими ҳақида қуйидагича изоҳ беришди.
"70-йиллар ортда қолди. Тўғри аввалари мен ҳам кокпит усти очиқ бўлиши керак деб ўйлар эдим, бироқ бундай фожеаларга якун ясаш керак", - дейди 2009 йилги мавсум чемпиони Женсон Баттон.
Ред Булл жамоасининг австралиялик погачиси Даниэл Риккардо ҳам Баттон фикрига қўшилди: "Ҳозирги вақтда пойгачининг энг нозик нуқтаси бу бош қисми бўлиб қолмоқда. Агарда шундай ҳимоя пайдо бўлса, бу пойгачининг ҳотиржам бўлишига ёрдам беради ва ҳавфни анча камайтиради".
Бироқ айни дамда Рено жамоасида иштирок этаётган Нико Хюлкенберг бу тизимни қоралади. "Менга бу ғоя ёқмаяпти. Фикримча пойгачи кабинаси доимо очиқ ҳолда бўлиши керак. Спорт прототип пойгалар айнан мана шундай кўринишда бўлиши керак. Бу спорткарлар эмас. Мен учун олди қисмида ойнаси бор автомобилни бошқариш муаммо эмас", - дейди Нико Хюлкенберг.
Мазкур йиғилиш доирасида шунингдек, пойгаларни томошабоплигини ошириш, ёнилғи ва бошқа эҳтиёт қисмларини назорат қилиш ва 2021 йилги двигателлар мавзуларида сухбат олиб борилди.
