"Барселона" клуби "ПСЖ"га ўтиб кетган Неймарни судга берди. Эслатиб ўтамиз, Неймар ўзининг трансферини 222 млн. еврога сотиб олди ва парижликлар билан шартнома имзолади.

11 август куни каталонияликлар Неймар устидан Барселона ижтимоий судига шикоят киритди. Жамоа шахсий шартнома бандини бузгани учун бразилиялик футболчидан 8,5 млн евро миқдорида пул ундирмоқчи. Бундан ташқари, "кўк-анорранглилар" зарарни қоплаш мақсадида юқоридаги сумманинг 10 фоизи миқдорида жарима ҳам ундирмоқчи. "Барселона" Неймардан жами 9,35 млн евро ундиришни режалаштирмоқчи. Бу ҳақда "Барса" расмий твиттери хабар тарқатди.

Худди шундай шикоятни "Барселона" Испания футбол федерацияси ва ФИФАга ҳам юборди. Каталонияликлар фикрича, агар Неймар мустақил равишда мазкур суммани тўлай олмаса, у ҳолда унинг ўрнига ПСЖ бу ишни амалга ошириши керак.

Эслатиб ўтамиз, 2016 йилнинг кузида Неймар "Барселона" билан шартномани узайтирганида 8,5 млн. евро миқдоридаги пулни мукофот сифатида олганди.