Аввалроқ Осиёда тўп сураётган футболчилар ва уларнинг топ-5 чемпионатларда кўрсатаётган ажойиб ўйинлари ҳақида маълумот беришни бошлаганимизга ҳам салкам 2 йил бўлиб қолди.

«Лестер» вакили Шинжи Оказакининг АПЛда урган голлари ўта қимматли бўлаётганлиги, бундеслигадаги японлар ҳам бўш ўтирмаганлиги, хитойлик футболчиларнинг Португалия ва Германия томон интилаётганлиги ушбу мавзуга яна қайтишимизга ундади.

Бундан ташқари, Қатарнинг Бельгия футболига бўлган қизиқишига ҳам алоҳида тўхталамиз. Ўз-ўзидан тушунарлики, бу сафар чемпионатлар географиясини янада кенгайтирамиз.

Эътироф

Қуйида кучли бешта чемпионатда ўз клубини алмаштирган ёки Европага янги келган ҳамда порлаши кутилаётган айрим осиёлик футболчиларга тўхталиб ўтамиз. Эътирофимиз рейтинг ва бонус («келажак умиди») кўринишида бўлади.

Такума Асано. Европадаги олдинги клуби: «Арсенал» (Лондон). Ҳуқуқий жиҳатдан шу клубга тегишли. Рақами: 11. Терма жамоаси: Япония. Илк профессионал клуби: «Санфречче Хиросима». 1994 йил 10 ноябрда туғилган. Терма жамоа сафида 7 ўйинда 2та гол урган.

Ўтган мавсумда қуйи бундеслигада «Штутгарт» сафида ўйнади ва асосий бундеслигага қайтди. Жорий мавсум бош мураббий Ханнес Вольф ундан асосан марказий ярим ҳимоячи сифатида фойдаланяпти. Айни пайт унинг жамоаси турнир жадвалида 10-ўринда боряпти.

Юнинг Жан. Европадаги олдинги клуби: «Витесс» (Голландия). Ҳуқуқий жиҳатдан «Вест Бромвич»га тегишли. Терма жамоаси: Хитой. Илк профессионал клуби: «Хангжоу Гринтаун». 1997 йил 5 январда туғилган. Терма жамоадаги дебюти: 2016 йил 3 июнь, Тринидад ва Тобагога қарши баҳсда. Терма жамоа сафида илк ўйинда «дубл»га эришгандан бери бош­қа гол уролмади.

Ўтган мавсум бу ҳужумчи «Витесс» сафида 24та ўйин ўтказиб, 3та гол урди. 2017 йил 3 июлда Англиянинг «Вест Бромвич» клуби уни харид қилди ва «Вердер»га ижарага бериб юборди. Трансфер суммаси ошкор қилинмади. Немис клубида у рақобатчиси Макс Крузедан маҳорат сирларини олиши керак.

Аарон Франк Муй. Жорий мавсум: 4 ўйин, 1та гол. Терма жамоаси: Австралия. Илк профессионал клуби: «Болтон Уондерерс». Терма жамоадаги дебюти: 2012 йил 7 декабрь, Гуамга қарши баҳсда. Клубдаги рақами: 10. 1992 йил 8 июлда Сидней шаҳрида туғилган.

«Хаддерсфилд»дан олдин Англияда икки клуб - «Болтон» ва «Манчестер Сити» таркибида бўлган, лекин ўйинларда иштирок этмаган. Қисқача қилиб айтсак, у ўзининг юлдузли даврларини салкам 7 йил кутган. 2017 йил 30 июнга келиб бонуслар билан 10 млн. фунтни ташкил этувчи трансфер амалга ошди. Яъни «Манчестер Сити» уни премьер-лига дебютантига пуллаб юборди.

Унинг ўйинлари марказда рақибни муносиб кутиб олиш ва рақиб ҳужумларини ривожлантиришга йўл бермасликдан иборат. Аслида, унда Голландия паспорти ҳам бор эди, чунки отаси немис, онаси голланд. Демак, Муй бир пайт­нинг ўзида учта терма жамоани (Австралия, Голландия ва Германия) танлаш имконига эга бўлган.

ҚАТАР ЭКСПАНСИЯСИ

Бельгиянинг «Эйпен» клуби 1945 йилда ташкил топган. Бугун у нега эътибор марказида? Айни пайт Қатар молиявий гуруҳларининг бевосита мазкур клубни ўз бошқарувига олганлиги тўғрисида маълумотлар бор.

Акс ҳолда, жаҳон чемпионати саралаши олдидан бирданига терма жамоанинг 4 футболчиси (Абдулкарим Ҳассан, Акрам Афиф, Фаҳад ал Абдулраҳмон Ассим Мадибо) ушбу жамоа таркибидан ўрин олишига қандай изоҳ бериш керак?

Шунингдек, Қатар футболи умиди дея баҳоланаётган Акрам Афифнинг ҳам мазкур клубга ўтиши қизиқишни янада оширади. Демак, қатарликлар Франция чемпионати билан қониқмай, Бельгия футболига ҳам «кўз олайтирган» кўринадилар.

ЯГОНА ЖАДВАЛ

«Хаддерсфилд Таун» вакили Аарон Муй сиймосида Англия футболида Австралиянинг яна бир ажойиб плеймейкери юзага чиқаётганига гувоҳ бўляпмиз. Демак, Австралия вакиллари Англияда ўз ўринларига эга чиқишда давом этадилар. Негадир Жанубий Корея, Япония ва Австралиядан бошқа Осиё юртларидан бу чемпионатга ҳеч ким кела олмаяпти.

Германияда эса ҳали-ҳамон Ж.Корея ва Япониядан келган футболчилар тўп суришмоқда. Бунга сабаб нафақат маркетинг, балки бу ўйинчиларнинг спорт формасини­ мунтазам юқори даражада ушлаб туришга бўлган интилишидир. Тез орада бу мамлакатлар сафига Ироқ ва Эрон қўшилса, ажабланмасдик. Айнан ушбу мамлакатлардаги бундеслига шуҳратини ёйиш мақсади кўплаб футболчилар таклиф этилишига сабаб бўлмоқда.

Испания Ла лигаси ҳамон осиёликлар учун бегонадек. Бир пайтлари Маъсуд Шожаи кабилар ўйнаганда «Осасуна» шижоати ҳаммани ҳайрон қолдирарди. Лекин сўнгги пайтларда бу чемпионатда ўртамиёна африкаликлар ва жанубий америкаликлар кўпайиб кетгани боис осиёлик футболчиларга нон топилмаяпти. Устига-устак, тил муаммоси ҳам бор.

Кетганлар тўғрисида гапирадиган бўлсак, Кейсуке Хонданинг Мексика чемпионати вакили «Пачука» сафига қўшилгани «Интер» - «Милан» тўқнашувини энди кутмаслигимизга ундаяпти. Чунки Юто Нагатомога қарши бошқа япон «Милан» сафида ўйнамайди. Бундан ташқари, камида 4-5 нафар япон футболчиси топ-5 чемпионатларидан ўз ватанларига қайтишди.

2017|2018 йиллар мавсуми учун Европадаги 8 чемпионат иштирокчилари томонидан рўйхатга киритилган осиёлик футболчиларга оид маълумотлар