«Барселона» бош мураббийи Эрнесто Вальверде ЕЧЛнинг 4-тури доирасида бўлиб ўтган «Олимпиакос»га қарши ўйин (0:0) борасида ўз фикрларини билдириб ўтди.

«Биз олдинга қадам ташладик, аммо ўзимиз истагандек эмас. Рақиб дарвозасига яқинлашиш мақсадида тўпни узоқ вақт давомида назорат қилдик. Рақиб ҳимояда ажойиб ўйнади. Плей-офф босқичи йўлланмасини нақд қилиб қўйишни истагандик, аммо уддалай олмадик.

Ўйиндан олдин Роберто ва Деулофеудан қайси бирини танлаш борасида иккиланиш бор эди. Ўйиннинг даражасини инобатга олган ҳолда Робертони бошланғич таркибда туширишга қарор қилдик. У сидқидилдан ишламоқда ва майдонда бўшлиқ ярата олади.

Рақиб чуқур ҳимояга ётиб олганида, тез-тез тўпни ошириш орқали ҳимоячиларни чарчатиш керак. Ёпиқ ҳимояни ёриб ўтиш — футболда энг қийини», – деди Вальверде.