«Barselona» bosh murabbiyi Ernesto Valverde YECHLning 4-turi doirasida bo‘lib o‘tgan «Olimpiakos»ga qarshi o‘yin (0:0) borasida o‘z fikrlarini bildirib o‘tdi.

«Biz oldinga qadam tashladik, ammo o‘zimiz istagandek emas. Raqib darvozasiga yaqinlashish maqsadida to‘pni uzoq vaqt davomida nazorat qildik. Raqib himoyada ajoyib o‘ynadi. Pley-off bosqichi yo‘llanmasini naqd qilib qo‘yishni istagandik, ammo uddalay olmadik.

O‘yindan oldin Roberto va Deulofeudan qaysi birini tanlash borasida ikkilanish bor edi. O‘yinning darajasini inobatga olgan holda Robertoni boshlang‘ich tarkibda tushirishga qaror qildik. U sidqidildan ishlamoqda va maydonda bo‘shliq yarata oladi.

Raqib chuqur himoyaga yotib olganida, tez-tez to‘pni oshirish orqali himoyachilarni charchatish kerak. Yopiq himoyani yorib o‘tish — futbolda eng qiyini», – dedi Valverde.