“Барселона”да рекордчи дарвозабонлар кимлар эканини биласизми? Қуйида Каталонияликлар тарихидан жой олган посбонлар ҳақида ўқишингиз мумкин.
"Замора" совринини энг кўп қўлга киритган дарвозабонлар
"Барселона" таркибида 10 нафар посбон Испания чемпионатидаги энг яхши дарвозабон совринини қўлга киритган. Улар орасида Антони Рамаллец ва Виктор Валдес бу мукофотни 5 мартадан ютиб, рекорд ўрнатишган. Антони 1951-1960 йиллар оралиғида, Виктор эса 2004-2012 йиллар оралиғида совринга эга чиқишган.
Дарвоза даҳлсизлигини сақлаш бўйича рекорд
Виктор Валдес 2011/12 йилги мавсумда 5-12 турлар оралиғида ўз дарвозаси даҳлсизлигини 896 дақиқа давомида сақлаб туришга муваффақ бўлди. 1972/73 йилги мавсумда эса Мигел Рейна 14-23 турлар оралиғида 824 дақиқа мобайнида ўз дарвозасига "қулф" солиб қўйган эди.
"Қуруқ" ўйин ўтказган дарвозабонлар
Виктор Валдес каталонияликлар сафида 535 учрашув ўтказиб шуларнинг 237 тасида дарвозаси даҳлсизлигини сақлаб қолган. У 44,3 % ўйинларда гол ўтказмаган. Андони Субисаретта эса 410 беллашувнинг 173 тасини "қуруқ" ўтказган. Андони 42,2 % тўқнашувларда ўз дарвозаси даҳлсизлигини сақлаб қолган.
