“Barselona”da rekordchi darvozabonlar kimlar ekanini bilasizmi? Quyida Kataloniyaliklar tarixidan joy olgan posbonlar haqida o‘qishingiz mumkin.
"Zamora" sovrinini eng ko‘p qo‘lga kiritgan darvozabonlar
"Barselona" tarkibida 10 nafar posbon Ispaniya chempionatidagi eng yaxshi darvozabon sovrinini qo‘lga kiritgan. Ular orasida Antoni Ramalles va Viktor Valdes bu mukofotni 5 martadan yutib, rekord o‘rnatishgan. Antoni 1951-1960 yillar oralig‘ida, Viktor esa 2004-2012 yillar oralig‘ida sovringa ega chiqishgan.
Darvoza dahlsizligini saqlash bo‘yicha rekord
Viktor Valdes 2011/12 yilgi mavsumda 5-12 turlar oralig‘ida o‘z darvozasi dahlsizligini 896 daqiqa davomida saqlab turishga muvaffaq bo‘ldi. 1972/73 yilgi mavsumda esa Migel Reyna 14-23 turlar oralig‘ida 824 daqiqa mobaynida o‘z darvozasiga "qulf" solib qo‘ygan edi.
"Quruq" o‘yin o‘tkazgan darvozabonlar
Viktor Valdes kataloniyaliklar safida 535 uchrashuv o‘tkazib shularning 237 tasida darvozasi dahlsizligini saqlab qolgan. U 44,3 % o‘yinlarda gol o‘tkazmagan. Andoni Subisaretta esa 410 bellashuvning 173 tasini "quruq" o‘tkazgan. Andoni 42,2 % to‘qnashuvlarda o‘z darvozasi dahlsizligini saqlab qolgan.
