Мадриднинг “Реал” клуби ва Португалия терма жамоаси ҳужумчиси Криштиану Роналду “France Football” нашри томонидан тақдим этиладиган “Олтин тўп” совринига эга бўлди.

Бешинчи марта “Олтин тўп”ни қўлга киритган 32 ёшли футболчи бу борада рақобатчиси Лионель Месси билан тенглашиб олди.

Соврин тантанавор равишда Эйфел минорасида ўз эгасига топширилди.

Маълумот учун, Роналду 2008, 2013, 2014 ва 2016 йилларда “Олтин тўп”ни қўлга киритган.

Айни дамда унинг рақобатчиси Лео Мессида ҳам бу совринлар 5 тани ташкил этмоқда.

2016/2017 йил мавсумидаги натижаларига кўра, Роналду Европа Чемпионлар лигаси ғолиби (энг яхши тўпурар – 12 гол), Испания чемпиони (29 учрашувда 25 гол), клублар ўртасидаги жаҳон чемпионати ғолиби (энг яхши тўпурар – 4 гол), УЕФА Суперкубок ва Испания Суперкубоки соҳиби бўлди.

Шунингдек, Роналду Португалия терма жамоаси билан Россияда ўтган Конфедерациялар кубоги мусобақасида бронза медалларига эга чиққанди.