Madridning “Real” klubi va Portugaliya terma jamoasi hujumchisi Krishtianu Ronaldu “France Football” nashri tomonidan taqdim etiladigan “Oltin to‘p” sovriniga ega bo‘ldi.
Beshinchi marta “Oltin to‘p”ni qo‘lga kiritgan 32 yoshli futbolchi bu borada raqobatchisi Lionel Messi bilan tenglashib oldi.
Sovrin tantanavor ravishda Eyfel minorasida o‘z egasiga topshirildi.
Ma’lumot uchun, Ronaldu 2008, 2013, 2014 va 2016 yillarda “Oltin to‘p”ni qo‘lga kiritgan.
Ayni damda uning raqobatchisi Leo Messida ham bu sovrinlar 5 tani tashkil etmoqda.
2016/2017 yil mavsumidagi natijalariga ko‘ra, Ronaldu Yevropa Chempionlar ligasi g‘olibi (eng yaxshi to‘purar – 12 gol), Ispaniya chempioni (29 uchrashuvda 25 gol), klublar o‘rtasidagi jahon chempionati g‘olibi (eng yaxshi to‘purar – 4 gol), UYEFA Superkubok va Ispaniya Superkuboki sohibi bo‘ldi.
Shuningdek, Ronaldu Portugaliya terma jamoasi bilan Rossiyada o‘tgan Konfederasiyalar kubogi musobaqasida bronza medallariga ega chiqqandi.
