Бирлашган Араб Амирликларида Лига кубоги доирасида ўзбек футболчилари шарафини ҳимоя қилаётган клублар ўзаро тўқнаш келишди. Азиз Ҳайдаровнинг "Ажман"и ўз уйида Сардор Рашидовнинг "Ал-Жазира" жамоасини қабул қилди.

Мазкур мусобақада 12та жамоа қатнашяпти ва улар дастлабки босқичда 2та гуруҳга бўлишган. Бир даврали тизимда ўтаётган гуруҳ босқичининг бугун 5-тур ўйинлари бўлиб ўтди.

Ўзбекистонлик футболчилар ўз жамоаларининг бошланғич таркибида майдонга тушди ва учрашувда тўлиқ ҳаракат қилишди. Баҳснинг 55-дақиқасида Аҳмад ал-Ғилоний томонидан урилган гол "Жазира"га ғалаба келтирди.

Натижада Рашидов жамоаси 4та ўйиндан кейин 10 очко жамғариб, амалда ярим финал йўлланмасини ҳал қилиб қўйди. Абу-дабиликлар 26 декабрь куни гуруҳ сўнгги тури доирасида "Ҳатта" клубини ўз майдонида қабул қилади. "Ажман" эса 5та ўйинда 4 очко тўплади ҳамда кейинги босқичга чиқа олмади.