ҒАЛАБА

Футбол эмас — қор жангидир бу,
Оқ гиламга тушди йигитлар.
Номус жанги, ор жангидир бу,
Сирпанса-да, учди йигитлар!

Бари — бургут,
Бари — қаҳрамон,
Қор куради кураги билан!
Оёғидан чалса қаҳратон,
Ўтди ўтли юраги билан!

Ён қўшни — жон қўшни-да,
Чиндан,
Ишқибозлар — Хитой девори.
Лекин бизда мўл экан чидам,
Кор қилмади на муз, на қори.

Ўзбекистон!
Бирма-бир қучиб,
Манглайидан ўпгин уларни —
Оқ либосда майдонга тушиб,
Кўк либосда енгган улларни.

Кўз тегмасин!
Авайла энди —
Топшир фақат тоза қўлларга.
Табиатнинг қорини енгди,
Дуч қилмагин сунъий дўлларга!

Нодир Жонузоқ